Nisar mai Teri Galiyon pe Aye Watan ke Jahan ( Lyrics & Download )

nisar main teri galiyon k ae watan, k jahan
chali hai rasm k koi na sar utha k chale

bahot hain zulm k dast-e-bahana-ju k liye
jo chand ahl-e-junun tere nam leva hain
bane hain ahl-e-hawas muddai bhi, munsif bhi
kise wakil karen, kis se munsifi chahen

bujha jo rauzan-e-zindan to dil ye samajha hai
k teri mang sitaron se bhar gai hogi
chamak uthe hain salasil to hamane jana hai
k ab sahar tere rukh par bikhar gai hogi

garaz tasavvur-e-sham-o-sahar main jite hain
giraft-e-saya-e-diwar-o-dar main jite hain

yun hi hamesha ulajhti rahi hai zulm se khalq
na unki rasm nai hai, na apani rit nai
yun hi hamesha khilaye hain hamne ag main phul
na unki har nai hai na apani jit nai

isi sabab se falak ka gila nahin karte
tere firaq main ham dil bura nahin karte

gar aj tujhse juda hain to kal baham honge
ye rat bhar ki judai to koi bat nahin
gar aj auj pe hai tala-e-raqib to kya
ye char din ki khudai to koi bat nahin

                                                        jo tujhase ahd-e-wafa ustavar rakhte hain
                                                       ilaj-e-gardish-e-lail-o-nihar rakhte hain


Singer           : Munir Hussain 
Poet              : Faiz Ahmed Faiz
Film              : Shaheed